Covid-19aren pandemiaren ondorioz, iaz Arabako ekoizleek baino ez zuten parte hartu Vital Fundazioak antolatutako Gabonetako Nekazaritza Azokan. Aurten, ordea, Plaza Berrira itzuliko dira Hego Euskal Herri osoko ekoizleak; orotara, 64 postu jarriko dira hilaren 23an, Gabon Gauaren bezperan, 9:00etatik 15:00etara bitartean.
Azoka tradizionala sei hamarkada luzez egin izan da Gasteizen, eta aurten ere erabateko normaltasuna berreskuratzea ezinezkoa izango bada ere, euskal ekoizleek ez dute hitzordura hutsik egingo.
Nolanahi ere, Vital Fundazioak indarrean dauden osasun gomendioetara egokitu du ekitaldia: postuen artean 2,5 metroko distantzia izango da, eta hamar metro egongo dira postuak kokatzeko eratuko diren hiru eraztun zentrokideen artean —iazko formatuaren antzera—. Plazak hiru sarrera eta irteera izango ditu, eta horietako bakoitzean hesien bidez bereizitako sarrera gune eta irteera gune mugatuak jarriko dira. Zenbait langilek bisitarien zirkulazioa gainbegiratu eta pilaketak saihesteko informazio lanak egingo dituzte.
Produktuak
Lau postuk eskainiko dituzte haragiak eta hestebeteak, beste lauk kontserbak, beste hiruk frutak, barazkiak eta ortuariak, zortzik likoreak, ardoak eta olioak, bost postutan eztia eta eratorriak, seitan bestelako elikagaiak, hamaseitan ogia, gozogintza eta gozokiak, eta zazpitan gaztak; bestalde, artisautza produktuak eskainiko dituzten beste sei postu ere izango dira.
Erronka Garbia ziurtagiria
Bigarren urtez jarraian, Gabonetako azokak Erronka Garbia - Ingurumen aldetik jasangarria den ekitaldia ziurtagiria izango du, mota horretako ekitaldi batek ingurumenean izan dezakeen eragin negatiboa minimizatzeko. Izan ere, ingurumen aztarna murriztu nahian diseinatu da ekitaldi osoa.
Gainera, Vital Fundazioak aldez aurretik banatutako 10.000 poltsa konpostagarri izango dituzte saltzaileek, salmentekin banatzeko.