Asteazken honetan, Europa Biltzar Jauregian egindako ekitaldi batean, Udalak jakitera eman du Gasteiz Hobetuz partaidetza programaren hirugarren edizioan boto gehien jaso dituzten proiektuak. Azken asteetan, 16 urtetik gorako 7.786 lagunek 23.000 boto baino gehiago eman dituzte —pertsona bat, hiru boto—, herritarrek proposatutako 128 ideien artean aukeratzeko; guztira 315 proposamen aurkeztu ziren, baina bideragarritasun teknikoaren iragazkia egin eta horietako batzuk bateratu zituzten.
Horren arabera, lehentasun hurrenkera ezarri dute herritarrek, eta prozesuaren antolatzaileek hainbat balio sendotzeko proposamenak bultzatu ditu: genero berdintasuna, belaunaldien arteko elkarbizitza, kultura aniztasuna eta aniztasun funtzionala, ingurumenaren babesa, arrakala digitala gainditzea eta kolektibo kaltetuenen gizarte inklusioa, besteak beste.
Hiru edizioetako partaidetza errekorra hautsita, Udaleko Herritarren Partaidetzaren eta Gardentasunaren Sailak herritarren hamalau ideia aukeratu ditu, udal gobernuak 2022 eta 2023. urteetan zehar gauzatu ditzan. Horretarako, hiru milioi euroko aurrekontua erreserbatu du Udalak.
"Gasteizentzat benetako arrakasta da partaidetza prozesu batek halako babesa jasotzea, eta horretatik proiektu zerrenda bat ateratzea, hainbat auzotan adin guztietako pertsonen bizitzak hobetzera zuzendutako proiektuen zerrenda bat, hainbat premia eta interesi erantzuten diena", nabarmendu du Borja Rodriguez zinegotziak.
Hamalau proiektu
Guztira, hamalau ideia aukeratu eta horien inguruko proiektuak gauzatu nahi ditu Udalak. Horiek guztiak bi kategoriatan banatu dituzte: alde batetik, bide publikoarekin lotutako jarduera eta inbertsioak; bestetik, bestelako programa edo inbertsioak. Honako hauek dira aukeratutako proiektuak, lortutako botoen hurrenkeran eta puntuazioaren arabera ordenatuta:
BIDE PUBLIKOA
- Elkarbizitzarako hezkuntza-patioa, Zaramagan (1.449 boto): Odon Apraiz ikastolako patioa auzorako espazio bihurtu, elkarbizitzarako, partaidetza-prozesu baten bitartez.
- Bizikleta-bideen sarea hobetzea (759 boto): bidegorrien sarea sendotu eta optimizatzea, zentzuz, hiri osoan.
- Borinbizkarreko jolas-parkea (613 boto): aisialdirako hainbat espazio, sektorearen erdiko parkean. Espazio askoz ere irisgarriagoa sortu, kontuan harturik genero-aniztasuna, belaunaldiak, iraunkortasuna eta kultura-aniztasuna eta funtzionala.
- Zabalparkeak (701 boto): aisialdi inklusiboko espazioak: aisialdi-espazio inklusiboen korridore bat, Zabalganetik Mariturriraino, dibertsitate funtzionala ez dadin eragozpena izan, eta auzoko haur eta gazteek baliatzerik izan dezaten.
- Komuna publikoak eta paperontziak Eraztun Berdean (441 boto): komuna publikoak, Eraztun Berdeko, Zabalganeko, Armentiako eta Salburuko parkeetatik gertu. Baita paperontziak ere, horietako ibilbideetan.
- Irisgarritasuna, zoladura eta lorategiak hobetzea, Abetxukun (414 boto): egokitu, hobetu eta irisgarriago egitea Abetxukuko Ibaialde kale osoa.
- Argiztapena hobetu, erabilera arduratsua tarteko (443 boto): mugimendu-sentsoreak jarri faroletan, pertsonak, ibilgailuak edo animaliak igarotzen direlarik argiztapen-intentsitatea areagotu dadin, eta bestela murriztu.
- Abetxukuko plaza Nagusiaren erabilera askotarako estalkia (397 boto): plazari bizia emateko aukera ekarriko duen estalkia instalatzea, erabiltzen dutenek aterpea izan dezaten.
- Abetxukuko espaloiak eta oinezkoen pasabideak konpontzea (397 boto): espaloiak zabaldu eta pasabide gehiago jarri, eta hormen egoera hobetu.
BESTE PROGRAMA ETA INBERTSIOAK
- Animaliak Babesteko Zentroan txakurren egonlekuetan berokuntza-sistema bat instalatzea (765 boto): egungo txakurrentzako egonlekuetan berokuntza-sistema bat jartzea.
- Zaramagako pilotalekua hobetzea (584 boto): irisgarritasuna hobetu, dibertsitate funtzionala duen pertsonentzat, eta emakumeentzako aldagelak jarri.
- Ni ere mugitzen naiz (378 boto): Zabalganeko institutuko ikasleek proposatutako ideia, produktu lokalen eta kultura-produktuen azoka ibiltari bat sortzeko, tartean direlarik merkataritza lokala eta Zabalgana eta Ariznabarreko zona batzuetako eta besteetako bizilagunak.
- Usoen kontrol etikoa, usategi ekologikoen bitartez (387 boto): gutxienez lau usategi eraikitzea, hiriko usoen populazioaren kontrola begirunez egin dadin.
- Auzoko herritar-sareak, genero-indarkeriaren kontra (317 boto): hiriko auzoetan, laguntza-, harrera-, zaintza- eta gaitzespen-sare bat sortzea, indarkeria mota horri aurre egiteko.