Irailean, Gasteizko Lakua auzoko etxebizitza batean droga saltzen ari zirela ohartarazi zuen informazioa jaso zuen Udaltzaingoaren Ikerketa Unitateak. Orduz geroztik, osasun publikoaren aurkako ustezko deliturik egon zitekeen ikertzen aritu dira; denbora horretan, besteak beste, zaintzak eta kontrolak egin dituzte udaltzainek.
Unitateko udaltzainek "pertsonen mugimendu handia" antzeman zuten etxebizitzatik gertu gelditzen ziren ibilgailuetan: "Ibilgailuetan zihoazenen eta komunitateko bizilagun baten arteko kontaktuak oso bizkorrak eta presazkoak izaten ziren", azaldu du Udaltzaingoak ohar batean. Gainera, mugimendu horiek "eguneko edozein unetan" gertatzen zirela ikusita, zaintza areagotu zuten.
Modu horretan, ikertutako pertsona kokaina trafikoaz arduratzen zela baieztatu zuten, baita senide batek merkantzia ematen ziola ere.
Bi gizonezkoak espetxera
Azkenik, ostiral goizean, Udaltzaingoak bi gizonezkoak atxilotu zituen, Gasteizko 4. instrukzio epaitegiarekin elkarlanean; baita haien bikotekideak ere —50 eta 32 urtekoak—, negoziorako ustezko laguntzaile gisa. Emakume gazteena, atxilotu aurretik eta beste pertsonak atxilotu egin zituztela susmatuta, etxean zuen droga suntsitzen saiatu zela antzeman zuten udaltzainek. Nolanahi ere, horietako batek substantzia gordeta zuten fardelak topatu ahal izan zituen.
Ondoren, Udaltzaingoaren Ikerketa Unitateak bi bikoteen etxebizitzak eta ibilgailuak erregistratu zituen, Ertzaintzaren Ertzainor Unitatearen laguntzarekin: ustezko saltzailearen etxean 21 gramo kokaina eta monodosiak prestatzeko hainbat elementu topatu zituzten. Horrez gain, bi etxebizitzetan 36.850 euro inguru aurkitu zituzten eskudirutan.
Epaileak bi gizonezkoak espetxeratzea agindu zuen; emakumezkoak, ordea, aske utzi zituen karguekin.