Pandemiak hobera egitearekin batera, neurri murriztaile gogorrenak atzean geratu dira. Urte eta erdi gogorraren ostean, Kutxiko Taskeroak Elkarteak Araba Kutxin ekimen berria abiatu du, bertako produktuak, ostalaritza eta poteoa berriro sustatzeko asmoz.
Aste honetan bertan, urriaren 20tik 24ra bitartean, asteazkenetik igandera, Arabako txakolina izango da lehen jardunaldiaren protagonista. Bost egunetan zehar, askotariko jarduerak antolatu dituzte: hilaren 20an, asteazkenean, inaugurazio brindisa eta aurkezpena egingo dute 13:00etan Fariñasen (Kutxi kaleko sarreran); eta ostegunean, 19:00etatik 20:30era, txakolin dastaketa egingo da Landatxon.
Gainera, ostiraletik igandera, egunean zehar, txistulari eta trikitilarien eskutik kale animazioa nagusituko da, tabernetan Arabako txakolina, gildak eta Idiazabal gazta dastatzeko aukerarekin.