Dagoeneko 300 pertsonak baino gehiagok eman dute izena Gasteiz Duatloiaren I. ediziorako, eta urriaren 4an amaituko da epea. Astearte honetan Kirol eta Osasun zinegotzi Livia Lopezek aurkeztu duenez, urriaren 10ean ospatuko da, Salburua, Zurbao eta Betoñu inguruan osatuko diren bi zirkuitutan.
Bi kategoria izango ditu probak: federatuen kategoria eta kategoria herrikoia. Aurreikuspenen arabera, 250 pertsonak parte hartuko dute 12:00etan abiatuko den kategoria nagusian; bi ordu lehenago, 10:00etan, 100 pertsona arituko dira kategoria herrikoian.
Covid-19aren aurkako segurtasun neurrietara egokituko dute ekitaldia. Boxen gunea Buesa Arenaren kupularen azpian egongo da, eta partaideek eta akreditazioa dutenak bakarrik sartu ahal izango dira bertara. 14:00etan amaitzea aurreikusi dute.
Federatuen kategoria
Bost kilometro oinez, hogei kilometro bizikletaz eta beste 2,5 kilometro oinez. Hasteko, Buesa Arenatik irten eta bi buelta eman beharko zaizkio lasterka 2,5 kilometroko zirkuituari.
Ondoren, bizikleta gaineko proba sei kilometro pasatxoko zirkuitu batean egingo da, Zurbaoko Atea, Hezeguneen Pasealekua eta Betoñuko industrialdean zehar. Hiru itzuli eman beharko zaizkio. Amaitzeko, beste buelta bat eman beharko zaio Buesa Arena inguruko zirkuituari, korrika.
Kategoria herrikoia
Bestalde, kategoria herrikoiaren kasuan, laburragoak izango dira distantziak: 2,5 kilometro egingo dira korrika (buelta bat zirkuituari), 13,4 kilometro bizikleta gainean (zirkuituari bi buelta) eta 2,5 kilometro korrika (beste buelta bat zirkuituari).
