Gizon bat atxilotu dute Gasteizen, sexu erasoa, lesioak, mehatxuak eta hertsapenak egotzita

Erredakzioa 2021ko ira. 15a, 10:30
Indarkeria matxistaren aurkako elkarretaratze bat Gasteizen. / ALEA

Ertzaintzak 37 urteko gizon bat atxilotu du astelehen honetan, etxean bikotekideari eraso egitea eta genero indarkeriarekin lotutako hainbat delitu egotzita. Ustez, aurpegian bortizki kolpatu zuen eta aizto batekin mehatxu egin zion, besteak beste.

Joan den igandean Gasteizko etxebizitza batean jazotako genero indarkeriako gertakari baten berri izan zuen Ertzaintzak, eta kasuaren nondik norakoak ikertzen ari da orduz geroztik. Ustezko erasotzaileak emakume bikotekidea aurpegian kolpatu zuen bortizki, behin eta berriz; gainera, aizto batekin mehatxu egin zion biktimari.

Ertzaintzak jakinarazi duenez, erasoaren hurrengo egunean, irailaren 13an —astelehena—, emakumeak osasun arreta jaso zuen, hainbat kolpe jaso zituelako. Ondorioz, ustezko erasotzailea atxilotu zuen Ertzaintzak, genero indarkeriako delitu bat egotzita. Besteak beste, sexu eraso, lesio, mehatxu eta hertsapen delituak leporatu dizkiote.

Gaur, asteazkenean, Gasteizko Emakumeen Aurkako Indarkeriaren Epaitegiaren esku utziko dute.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide