Olarizu Eguna

Mugarriak bisitatu ditu udalbatzak, makroproiektuen aurkako protesta artean

Udalbatzako ordezkari politikoen bisita mugarrietara. / GASTEIZKO UDALA

Olarizuko Egunean, bederatzi kilometro baino gehiagoko ibilaldia egin dute ordezkari politikoek, Gasteizko mugarriak bisitatzeko. Ibilbidean, makroproiektuen aurkako Araba Bizirik plataformaren protestarekin egin dute topo.

Duela bost mendetik hona urtero egin ohi denez, eta iaz bezala —hau da, prebentzio neurri sanitarioekin—, Gasteizko alkateak eta zinegotziek Erretana, Gamarra, Gamarragutxia, Dura, Artzubiaga, Betoñu, Zurbao, Elorriaga, Arkauti, Arkaia, Ilarratza, Jungitu eta Uribarri Arratzuko lurretan kokatutako 28 mugarriak bisitatu dituzte astelehen honetan.

Erromeriarik gabeko Olarizuko Eguneko ekitaldi bakarra izan da. Alkatea, basozain nagusi gisa, taldeburu izango da Gasteiz udalerriko mugak inguratuko dituen 9,4 kilometroko ibilbidean zehar.

Pandemia hasi zenetik azken bi urte hauek salbuespen izan badira ere, erromeria egin izan ohi dute gasteiztarrek irailaren 8aren —Ama Birjinaren Jaiotzaren Jaia— osteko astelehenean, nekazarien ohitura zaharrari jarraituz, udaren zikloa ixteko eta uzta-bilketagatik eskerrak emateko.

Makroproiektuen aurkako protesta

Bestalde, ordezkari politikoen ibilaldia baliatu du Araba Bizirik plataformak, bere aldarrikapenak plazaratzeko eta urriaren 23an makroproiektuen aurka Gasteizen egingo den manifestazio bateratura deitzeko; 18:30ean abiatuko da Bilbo plazatik.

Arabako lurraldean martxan dauden hainbat makroproiekturen aurkako mugimenduek osatzen dute Araba Bizirik izeneko plataforma berria: AHTrik Ez plataforma —Abiadura Handiko Trenaren aurkakoa eta gaur egungo trenbide sareak erabiltzearen aldekoa—, Arabako Mendiak Aske —lurraldeko mendietan eraikitzekoak diren zentral eolikoen aurkakoa—, Elikadura Iraunkorraren Aldeko Mugimendua —negutegi erraldoien aurkakoa eta elikadura sistema jasangarrien aldekoa— eta Proiektu Honi Ez —Solariak Duran eraiki nahi duen parke fotovoltaiko erraldoiaren aurkakoa—.

Gaur egun "abian dauden proiektuak gelditzea eta landa zein natura inguruneak babestea" eskatu dute, besteak beste. Astearte honetan, 11:00etan Arabako Kontzeju Elkartearen egoitzan (Elorriaga), prentsaurreko batean aurkeztuko dute manifestazio deialdia.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide