Uztailean bertan behera utzi zuten Ironmana irailaren 12an bueltatuko da Gasteizera. Modu honetan, mundu osoko berrogei bat hirik osatzen duten zirkuituaren parte izango da Gasteiz bigarren aldiz. Pandemiaren eraginez, ordea, hainbat aldaketa izango dira ibilbidean, eta ohi baino parte-hartzaile gutxiago izango dira.
Lasterketa proban izango da aldaketa nagusia. Gasteiz erdigunetik egiten zen ibilbidea alde batera utzita, Salburua hezegune inguruan egingo da oraingoan ibilaldia; 42,2 kilometroko ibilbidea izango da, Buesa Arena pabiloian hasi eta bukatuko dena.
Igeriketa proba Uribarri Ganboako urtegian egingo da; triatletek 3.800 metro egin beharko dituzte honetan. Bizikleta gainean, berriz, 180 kilometroko zirkuitua izango dute, Arabako Lautada igaroz, eta Uribarri Ganboako aintzira ikusgarria inguratuz.