Aurten ere, bihartik aurrera, FesTVal telebista jaialdiaren egoitza bihurtuko da Gasteiz. Igandera bitartean, Masterchef Celebrity, Celebrity Bake-Off, Lola, Baserria, By Ana Milan eta Los Hombres de Paco bezalako nobedadeak estreinatuko dituzte.
Aurtengo jaialdiaren oholtzetako bat izango da Iradier Arenako Kultura Bizia gunea. Larunbatean, irailaren 4an, bertan izango da amaiera gala, eta bertan banatuko dira FesTVal sariak; sarrerak 16 eurorengatik salgai daude dagoeneko. Aurtengo saridunen artean Ana Garcia Obregon, Pablo Motos, Antidisturbios, Hierro eta Pasapalabra egongo dira.
Igandean, berriz, Udal Musika Bandak telesail eta filmen soinu-bandetan oinarritutako Fuera de serie emanaldia eskainiko du; kontzerturako sarrerak 5 edo 6 eurorengatik eskuratu daitezke.
Honako dokumentu honetan jaialdiaren egitarau osoa kontsulta dezakezu:
ESTREINALDIAK
- Lola, Lola Floresen bizitza eta artea berrikusten duen telesail dokumentala, Movistar+ taldearen eskutik, 100 Balas ekoiztetxearekin (The Mediapro Studio) elkarlanean.
- Celebrity Bake Off, sukalde batean inoiz egon ez diren hamabi aurpegi ezagun gozogile amateur onena izateko lehian. Amazon Prime Video streaming plataformaren estreinaldia FesTValen.
- Baserria, Klaudio Landak aurkeztutako reality showaren aurpegi berriak ezagutaraziko ditu EITBk.
- By Ana Milán, Atresplayer Premiumek telesailaren denboraldi berria aurkeztuko du. Errealitate eta fikzioa uztartzen dituen komedia hau aktorearen bizipenetan oinarrituta dago.
- Todos mienten telesaila, Movistar+ plataformaren eskutik. Urbanizazio esklusibo batean bizi den irakasle baten istorioa kontatzen du; bere familiak eta lagunek gaitzesten dute, bere ikasleetako batekin harremana izan duela jakin ondoren. Herriko gauzak are gehiago korapilatzen dira biztanle baten gorpua agertzen denean. Ba al du zerikusirik heriotza honek irakaslearen eta ikaslearen bideo sexualarekin?
- Ana Tramel. El juego, RTVEren telesail berria. Roberto Santiagoren eleberriaren telebistarako egokitzapena. Jokoaren mundua ardatz duen thriller judizial honetan, abokatu penal batek bere anaia kasino garrantzitsu bateko zuzendaritzako kide bat hiltzearen akusaziotik defendatzen du.
- Masterchef Celebrity, RTVEren eskutik. Sukaldaritzako talent show-a lehiakide berriekin itzuliko da, eta guztiak Gasteizera hurbilduko dira saioaren berri ematera.
- Los hombres de Paco telesailaren denboraldi berria estreinatuko du Antena 3 telebistak, hamar urteren ostean.