Gasteizko Magialdiaren 33. edizioa irailaren 13tik 19ra bitartean ospatuko da, Arabako Ilusionisten Elkartearen eskutik. "2020an, mundu osoan aurrez aurre egindako magia biltzar bakarra izan zen Magialdia. Aurten bere distiraren zati bat berreskuratu du ekitaldiak, osasun egoerak ahalbidetzen duen neurrian, eta munduko artista onenetako batzuk aurkeztuko ditu, programa zabal eta kalitate handiarekin", nabarmendu du Estibaliz Canto kultura zinegotziak.
Villa Sofia txoko berria
Magialdiaren zuzendari Jose Angel Suarezek, bestetik, programaren berrikuntzak aurkeztu ditu, estatuko zein nazioarteko ilusionistek parte hartuko duten jaialdian. "Santa Maria katedralak 'Linterna Magikoan' oinarritutako ikuskizun bat hartuko du, magia ibilbideen barruan Villa Sofia sartuko da, eta Amaiera Gala Iradier Arenan egingo da". Ekitaldi nagusiak Principal antzokian izango dira, eta, horietaz gain, magia ikuskizunak izango dira Ignacio Aldecoa kultura etxean eta Atarian, magia ibilbideak hiriaren erdialdean, eta magia emanaldiak erakusleihoetan.
Taula gainean izango diren magoen artean, besteak beste, Jimmy Delp (Frantzia), Ton Stone (Suedia), Dion (Holanda), Jaana (Alemania), Roberto Giobbi (Suitza) edota Joaquin Matas (Espainia) izango dira. Hainbat herrialdetako 300 mago baino gehiago izango dira.