Igande goizaldean, Gasteizko Udaltzaingoak 19 urteko gizonezko bat atxilotu zuen Zaramagako etxebizitza batean, bikotekidearen aurkako eraso delituaren ustezko egilea izateagatik. Erasoa borroka baten erdian gertatu zen. Eztabaida zela eta, bere esku-hartzea eskatzeko dei bat jaso zuen Udaltzaingoak. Patruilari atea ireki zion gizonezkoak arropa hautsita zuen eta odol-orbanak zituen; emakumeak, berriz, zenbait zauri zituen aurpegian.
Lesioak ikusi eta inplikatutako pertsonen adierazpenak entzun ostean, udaltzainek gizonezkoa atxilotu zuten eta epailearen esku utzi. Bestalde, bikotekidea ere ikerketapean dago, etxeko indarkeria delituaren ustezko egilea izateagatik.
Mehatxuak eta bizileku-bortxaketa
Astelehenean, Zabalgana auzoan, 57 urteko beste gizonezko bat atxilotu zuen Udaltzaingoak, bikotekide ohiari mehatxu egiteagatik eta bizilekua bortxatzeagatik. Bere bikotekide ohia bere baimenik gabe etxera sartu eta mehatxu egin ziolako, emakumeak etxetik alde egin zuen eta bertaratzeko eskatu zion Udaltzaingoari.
Udaltzainek gizonezkoa atxilotu zuten, bere ondasunak gordetzeko poltsa batekin ataritik ateratzen ari zela. Gaur jarri dute epailearen esku, Emakumearen aurkako Indarkeria Epaitegira dagozkion izapidetzeak bidali ostean.
Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.