Gasteizko toponimia historikoa aztertzeko urrats berri bat

Roberto Glez. de Viñaspre, Elena Martinez de Madina eta Iñaki Gurtubai. / GASTEIZKO UDALA

Gasteizen euskararen erabilera sustatzeko lankidetza hitzarmena berretsi dute Udalak eta Euskaltzaindiak. Besteak beste, udalerriaren toponimia historikoa aztertzeko Elena Martinez de Madinaren lana babestuko dute.

Gasteizko Udalak eta Euskaltzaindiak berritutako lankidetza hitzarmena aurkeztu dute astelehen honetan. Horrekin batera, hitzarmenaren barruan aintzat hartutako Gasteizko toponimia. Arratzua III liburuaren berri eman dute Roberto Gonzalez de Viñaspre euskaltzain oso eta Euskaltzaindiaren Arabako ordezkariak, Iñaki Gurtubai Gasteizko alkateorde eta Euskarako zinegotziak eta liburuaren egileak berak.

Elena Martinez de Madina ikerlari eta euskaltzain urgazlearen lana Gasteizko toponimiaren inguruko sailaren azken alea da. Bere ikerlanak udalerri osoko toponimia historikoa eta gaur egungoa aztertu ditu; hots, hiria bera eta udalerriko 63 herri. Arratzuko merindadearen ohiko toponimiak aztertzen dituen liburu honekin amaituko da berari eskainitako hiru aleko seriea. Oraingo lan honetan zazpi herri aztertu dira: Ilarratza, Jungitu, Lubinau, Matauku, Oreitia, Uribarri Arratzua eta Zerio.

Lankidetza hitzarmena

Liburuaren aurkezpena baliatu dute Udalak eta Euskaltzaindiak urteko lankidetza hitzarmena jendaurrean sinatzeko. Hitzarmen berriari esker, hirian euskara sustatzen ahaleginduko da Udala, Euskaltzaindiarekin elkarlanean. Horretarako, Udalak 63.000 euro emango dizkio Euskararen Akademiari, urte osoan kultur zabalkunderako jarduerak, ikastaroak eta hitzaldiak antolatzeko. Horrez gain, Euskaltzaindiaren aholkularitza emango dio Udalari euskararekin lotutako gaietan.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide