Udaren atarian, Gasteizko Judimendi auzoko Jose Lejarreta kaleko 41. zenbakian kokatutako ARTgia Sorgune & Aretoak lau urte bete ditu, eta "ikusleengandik, artistengandik, musikariengandik, kazetariengandik eta abarrengandik" jasotako babesa eskertzeko egitaraua antolatu dute ekainerako.
Egitaraua joan den ostiralean hasi zen, ekainaren 4an, Aurora Briz eta Juantxu ta Solo musikarien eskutik. Ekainaren 11n, Cucharachas musika talde gasteiztarra ere izango da ARTgian. Ekainaren 17an, berriz, Eskoriatzako Oihana Arana idazleak Lazunak azazkaletan bere liburua aurkeztuko du. Ekainaren 18an, Marta Aguirre eta Miss SanSanek dantza eta bideo proiekzioak uztartuko dituzte, Sua ikuskizunean.
Amaitzeko, ekainaren 25ean, Mikel Ezkerro gasteiztararen VIVE vol. ⅓ dokumentalaren aurkezpena hartuko du aretoak. Ezkerrok Peruko horma-irudigintza ikertu du dokumentalean, eta proiekzioaren ostean, kale-arte sozialaren inguruko mahai inguru bat antolatu dute. Raperoak, graffiteroak, kale-antzerkilariak, horma-irudigileak eta espazio publikoa arte adierazpen ezberdinen bidez aktibatzen duten artistak izango dira bertan.
Dagoeneko sarrerak erreserba daitezke, artgiada@gmail.com helbidera idatziz; mezuan, ikuskizuna, izen-abizenak eta telefonoa adierazi beharko dira.
