Osasun egoera hobetzen doan bitartean, kulturak berpizten jarraitzen du. Aste honetan, Udalak iragarri du aire zabaleko kultur programazioa izango dela uda honetan Gasteizko hamalau espaziotan. Besteak beste, haurrentzako ikuskizunak, musika, antzerkia edo bakarrizketak izango dira.
Kultura zinegotzi Estibaliz Cantok jakinarazi duenez, programazioa uztailaren 4an hasi eta irailaren 5era arte luzatuko da. Ikuskizun guztiak aire zabalean egingo dira, esparru hesituetan eta edukiera mugatuarekin. "Antolatzen ditugun jardueretan parte hartzen dutenen segurtasuna bermatzea da gure lehentasuna", azpimarratu du zinegotziak.
Hamalau parke eta plaza
Egitarauaren xehetasun guztiak ekainean emango dituzten arren, dagoeneko iragarri dituzte aire zabaleko ikuskizunak hartzeko aukeratu dituzten hamalau plazak:
- Arriagako parkea
- Aranbizkarreko parkea
- Hegoalde, Zabalgana eta Ibaiondoko gizarte-etxeen kanpoko aldea
- Gabriela Mistral kirol-zelaiak
- Santa Maria plaza
- Iparraldeko parkea
- Falerina lorategia
- Elurzuloaren ingurua
- Zulueta lorategiak
- Judimendiko parkea
- Pierola lorategiak
Estibaliz Cantok azaldu duenez, 200 pertsona inguruko edukiera aurreikusi dute espazio horietarako. Gainera, segurtasun neurri guztiak kontuan hartuko dira, eta protokoloa lantzen ari da Udala.