Udal Administrazioaren eta Eraldaketa Digitalaren Sailaren berrikuntza teknologiko bati esker, Herritarren Udal Txartela (HUT) mugikorretik erabili ahal izango da maiatzaren 24tik aurrera. Txartel fisikoak mantenduko dira, beraz, erabiltzaileak nahiago duen aukera erabili ahal izango du une bakoitzean.
Sistema berrian, erabiltzailearen argazkia, izen-deiturak, jaioteguna eta nortasun agiria agertuko dira; horrekin batera, barra-kode bat, QR kode bat eta itsasontzien jokoa izango ditu. Modu horretan, adibidez, posible izango da udal liburutegietan liburuak maileguan hartzea, udal instalazioetan sartzea edo udal ikastaroetan izena ematea.
Txartel bat baino gehiago kargatzeko aukera emango du, eta hori bereziki erabilgarria izango da gurasoentzat, seme-alaben HUTa ere gorde ahal izango dutelako.
Mendizorrotza eta Gamarra
Udako kanpaina maiatzaren 28an hasiko da Gamarra eta Mendizorrotzeko igerilekuetan, eta aurten ez da erreserbarik beharko. Sistema berriarekin, gainera, gasteiztarrek lehen aldiz erabili ahal izango dute mugikorra instalazioetara sartzeko. Kirol guneetan sartzeko tornuak egokitu dira HUT mugikorrak daraman QR kodea irakurtzeko.
SMS mezuak
Sistema berria ezarri bezain laster, maiatzaren 24tik aurrera, Udalak SMS mezu bana bidaliko die titularrei, txartela gailuetan instala dezaten. Lotura batean klik egin eta argibideak jarraitu beharko dituzte; betiere, erabiltzaileak bere telefono zenbakia eman behar izango du aurretiaz.
Beste aplikazio batzuk
Gasteizko Udalak beste hainbat berrikuntza teknologiko aurkeztu ditu 2021ean zehar; horien artean bi web aplikazio:
- VGReservas: udal instalazioetako erreserbak kudeatzeko.
- GeoVitoria-Gasteiz: geolokalizazio-aplikazioa, udalerriko toki, jarduera eta interesguneak plano edo satelite bidezko argazki baten gainean kokatzea ahalbidetzen duena.
Horrez gain, WhatsApp bidezko informazio zerbitzua ere martxan jarri du aurten, Enplegu Zerbitzuaren ikastaroei buruzko berriak jasotzeko.
