Gasteizko Udalak eta Ikusgune - LGTBIfobiaren aurkako Behatokiak hainbat jarduera antolatu dituzte maiatzaren 17ko Lesbo-Bi-Gay-Transfobiaren aurkako Eguna dela eta. Urtero, egun horretan ospatzen da Osasunaren Mundu Erakundearen (OME) Batzar Nagusiak homosexualitatea gaixotasun mentalen zerrendatik kendu izana; hain zuzen ere, 1990eko maiatzaren 17an.
"Ikuspegi pertsonaletik eta kolektibotik gure inguruko lesbianek, bisexualek, gayek eta transek pairatzen duten bazterkeriari eta indarkeri buruz hausnartzeko eta horren aurka borrokatzeko" egitaraua izango da, aurreko urteetan antolatutako ekintzen ildotik. Adibidez, Ikusgune behatokia bera abian jartzea, Hara! Udalaren berdintasunerako politiketan sexu eta genero aniztasuna txertatzeko 2018-2021 Agenda delakoaren testuinguruan.
Aurtengo jardueren helburua "Udalaren antolaketa kulturan eta gizartean balio aldaketa bat lortzea" izango da, Berdintasun zinegotzi Miren Fernandez de Landak azaldu duenez.
Egitaraua
- Maiatzaren 11n, 19:00etan Etxanobe Jauregiko Emakumeen etxean, Miriam Sola genero eta LGTBI politiketan aditu, aktibista eta ikertzaile feministaren hitzaldia: Subjektu feministari eta haren ondorioei buruzko eztabaidak pentsatzeko gakoak.
- Maiatzaren 13an: Sexu-orientazioaren eta genero-identitatearen aurka izandako gertakariei buruzko txostenaren aurkezpena, Ikusgune Gasteizko LGTBIfobiaren aurkako behatokiaren eskutik.
- Maiatzaren 15ean, 19:00etan Principal Antzokian: Rodrigo Cuevasen kontzertua.
- Maiatzaren 18an, 19:00etan Etxanobe jauregiko Emakumeen etxean: Victor XX film laburra eta solasaldia Ian Garrido zuzendariarekin elkarrizketa.
- Maiatzaren 20an, 18:15ean zineforuma Florida Zinemetan: Matthias and Maxime (Xavier Dolan, 2019).
- Maiatzaren 21ean, 19:00etan Etxanobe jauregiko Emakumeen etxean, Rosa Almirall cis emakume, feminista eta urratzailearen hitzaldia: Trans* pertsonen osasuna. Trànsit, paradigma aldaketa bat.