Maiatzaren 6rako azoka agroekologiko berri bat antolatu dute Slow Food Arabak, Ekolurrak eta Bionekazaritza Arabako Nekazaritza Ekologikoaren aldeko Elkarteak. Osteguneko 10:00etatik 14:00etara bitartean, hainbat jarduera izango dira Euskal Herriko Unibertsitateko (EHU) Arabako Campusean.
Alde batetik, Letren Fakultateko klaustroak elikagai ekologikoen, tokiko elikagaien eta bidezko merkataritzaren informazioa eta salmenta izango duten postuak hartuko ditu.
Horrez gain, hainbat hitzaldi antolatu dira goizean zehar Micaela Portilla Ikerketa Zentroko ekitaldi aretoan. Besteak beste, Arabako parke eolikoak, beganismoa eta Covid-19aren osteko ekonomia ekologikoa izango dira mintzagai.