San Prudentzio

Armentiako zelaiak hesitu eta sarbideak kontrolatuko ditu Poliziak

San Prudentzio eguneko ospakizuna, pandemiaren aurretik. / ALEA

San Prudentzio egunean jende pilaketak saihesteko, Armentiako zelaietara ez joateko eskatu du Herritarren Segurtasunaren Sailak, eta sarbideak kontrolatuko dituzte Udaltzaingoak eta Ertzaintzak.

Asteazken honetan, apirilaren 28an, kontrol eta zaintza berezia ezarriko dute Udaltzaingoak eta Ertzaintzak Armentian, San Prudentzio eguna dela eta. Polizia zelaietan egongo da, sarrera kontrolatzeko eta bertan gasteiztar asko elkartzea saihesteko.

Gainera, edukiera mugatuko da eta Armentiako zelaiak zedarritu egingo dira. Sarrera zein irteera eremu bana izango dira, biak ere basilikaren ondoko aparkalekuan. Era berean, Armentiara sartzeko bideetan trafikoa kontrolatuko du Udaltzaingoak, eta bizilagunen, zerbitzu publikoen eta Tuvisako autobusen zirkulazioa baino ez da baimenduta egongo.

Nolanahi ere, Armentiara ez joateko eta ospakizunak hurrengo baterako uzteko gomendioa zabaldu du Udalak. "Pertsona guztien osasuna babesteari eman behar zaio lehentasuna orain, eta, horretarako, ezarritako neurri sanitarioak zorrotz bete eta jende pilaketak saihestu behar dira", azaldu du Herritarren Segurtasunerako Saileko zinegotzi Marian Gutierrezek.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide