Mobilizazioa Gasteizko Andre Maria Zuriaren plazatik abiatu da eta, ondoren, erdialdeko higiezinen agentzien egoitzetara jo du, bertan elkarretaratze laburrak egiteko. Etxebizitza bat eskuratzen saiatzerakoan, enpresa horiek "filtro arrazista ilegalak" erabiltzen dituztela salatu dute bi elkarteek.
Gasteiz "harrera hiria" izatea eskatu eta etxebizitza eskubide bat dela aldarrikatu dute mobilizazioan.
Filtro arrazistak frogatzeko esperimentua
Duela egun batzuk, aspalditik datorren kezka bat frogatzeko asmoz, Etxebizitza Eskubidearen aldeko eta Gizarte Bazterkeriaren aurkako plataformak higiezinen agentzia batzuetara deitu zuen. Telefono bidezko esperimentua honakoa zen: hainbat etxebizitzari buruzko interesa adieraztea, baina profil ezberdinekin.
Agentzia horien erantzuna ezberdina al da pertsona arrazializatuek deitzen dutenean edo bertako azentua duten pertsonek egiten dutenean? "Emaitza negargarria izan zen", kritikatu du Inor Ez Etxerik Gabe ekimenak.