Koronabirusa

San Prudentzio egoitzak Osasun Sailaren agindurik gabe ezarri zuen egoiliarren konfinamendua

Erredakzioa 2021ko api. 12a, 09:00
Positibo baten ondorioz, San Prudentzioko egoiliarrak konfinatuta egon dira. / GOOGLE MAPS

Osasun Sailak ez zuen egoiliarren konfinamendurik agindu San Prudentzio egoitzan. Babestu Araba plataformak salatu du langile baten positiboaren ondorioz egindako kudeaketa "arbitrarioa" izan dela eta "protokoloa gaizki interpretatu" dela.

Martxoaren 29an, Arabako egoitzetako zein eguneko zentroetako erabiltzaile eta senideak biltzen dituen Babestu elkarteak salaketa aurkeztu zuen Arabako Osasun Saileko Lurralde Ordezkaritzan, San Prudentzio egoitzan hartutako neurriak "gizagabeak" zirela baloratuz.

Izan ere, langileen artean Covid-19 positibo bat atzeman ostean, San Prudentzio udal egoitzak senideei jakinarazi zien solairu bateko egoiliarrak norbere geletan konfinatuko zituztela, Osasun Sailak agindutakoa betetzen ari zirela azalduz.

Konfinamendu indibiduala apirilaren 9an amaitu zen, eta senideek egun horretan bertan jaso zuten salaketaren erantzuna. Arabako Lurralde Ordezkaritzak egoitzak adierazitakoa gezurtatu du: "Eusko Jaurlaritzako Osasun Sailak ez du ezarri solairu horretako egoiliarrak beren geletan konfinatuta egon daitezen, espazio komunak partekatu gabe, apirilaren 8ra arte".

Babestu Araba plataformaren ustez, erantzun horrek berresten du San Prudentzio egoitzaren kudeaketa "arbitrarioa" izan dela eta "ez dela inolaz ere lehenetsi egoitzako solairu horretan bizi diren pertsonen ongizatea".

Horrenbestez, protokoloak aldatzea eta neurriak hartzea eskatu du Babestuk, "senitartekoek eta San Prudentzio egoitzako erabiltzaileek jasandakoa berriro gerta ez dadin".

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide