Datorren asteko asteburuan, hilaren 16, 17 eta 18an izango dira 'Kulturunea' programako emanaldiak, 19:30ean. Hurrenez hurren, Olatz Salvador, Dupla bikotea eta Kai Nakai (Iratxe Aguilera) arituko dira oholtza gainean, Dendarabako aretoan. Bertan aforo mugatua izango dute, eta saio bakoitzak 5 euroko sarrera izango du. Aretoan ez ezik, Gaztea eta Vital Fundazioaren webguneetan ere jarraitu ahal izango dira, streaming bidez. Horrez gain, etorkizunean ETB1 bitartez ikusi ahal izango dira kontzertuak. Gaztea irratiko Ainhoa Vitoria esataria arituko da aurkezle lanetan.
Iaz pandemia arintzeko sortu zuten ekimena, eta, haren emaitza ona ikusita, aurten errepikatzea erabaki dute. Ohar batean diotenez, "artearen mundua sustatzeko eta dinamizatzeko, eta publikoa berriz erakartzeko" abiatu dute ekimena. Iazkoarekin alderatuz, aurtengo saioa adin tarte gazteago bati bideratu nahi izan dute.