Udaberrirako programazioaren barruan, antzerkiari lotutako deialdi berria proposatu du Gasteizko Oihaneder Euskararen Etxeak: Taulara mikroantzerki lehiaketa. Antzerki munduko norbanakoei eta taldeei zuzendutako deialdia da hau, eta euskarazko antzezlan laburren sormena suspertzea du helburu.
Antzerki lan laburrentzako eta bakarrizketentzako plaza izango denez, formatu txikiko proposamenak izan beharko dira, atrezzorik gabeak: antzezlanek 15 eta 20 minutu arteko iraupena izan beharko dute; eta euskara hutsean eginak egongo dira.
Lanaren gidoia edo emanaldi baten bideoa aurkeztuko dute 18 urtetik gorako interesatuek oihaneder@oihaneder.eus helbidean, maiatzaren 3a baino lehen. Hiru lan aukeratuko dira jasotako proposamen guztien artean eta bakoitzak 600 euroko saria jasoko du. Lan irabazleak ekainaren 18an aurkeztuko dira Oihanederren, eta saio honetan emango da laugarren saria, publikoarena.