Gasteizko Udalak Ingurugiro Gaietarako Ikastegiarekin batera bultzatutako VGBiziz sareak bizikletak gordetzeko hamargarren lonja ireki du Arabako hiriburuan. Hedegile kaleko 76. zenbakian estreinatutakoa lehendik zeudenei —autobus geltokian, postetxean, Mendizorrotzean, Arabako campusean, Santiago Ospitalean, Aranan, Adurtzan, Ariznabarrean eta Santa Barbarako aparkalekuan— gehituko zaie.
Hiriko hamargarrena da, baina gisa horretako lehena Alde Zaharrean. Halaber, lehenengo aldia da 21 Zabalgunearen udal lonja bat birgaitzen dela erabilera hori emateko, Mugikortasunaren eta Espazio Publikoaren Sailaren 36.000 euro baino gehiagoko inbertsioari esker; Energiaren Euskal Erakundearen finantzaketa ere izan dute lanek.
Gaur egun, VGBiziz sareko zerbitzuak 2.760 pertsona baino gehiagori ematen die zerbitzua. "Sarea funtsezko zerbitzua da mugikortasun eredu berri bat sustatzeko", azpimarratu du Raimundo Ruiz de Escudero zinegotziak.
30 aparkaleku
Hedegile kaleko 76. zenbakiko lokal berriak 30 bizikletarentzako lekua du, 67 metro koadroko espazioan; plaza horietako bi zama-ibilgailuentzat dira.
Horrez gain, bizikleta elektrikoak kargatzeko bost gune jarri dituzte. Sare bereko beste lonjetan bezala, aldez aurretik abonamendua kontratatu ondoren, aplikazio bat erabiliz sar daiteke lokalera.