Gasteizko Zaramaga auzoko Bizigarri Auzo Elkarteak sinadura bilketa bat egin du, auzoan menpeko adineko pertsonak zaintzeko baliabide eta zerbitzu publikoak eskatzeko, eta 2.000 sinadura baino gehiago lortu ditu. Astelehenean, martxoaren 15ean, Gasteizko Udaleko Gizarte Zerbitzuen Batzordera joango dira eta bertan, ekimena udalbatzako kideen aurrean aurkezteaz gain, betetzea ere eskatuko dute.
Auzoan zerbitzuak emateko eskatzen dute, hala nola, egoitza txikiak, eguneko zentroa edo etxebizitza komunitarioak. "Azken batean, hurbileko zerbitzu publikoak eskatzen ditugu, pertsonak erdigunean jarriko dituztenak eta haien ongizatea eta hurbileko ingurunearekin duten lotura bermatuko dutenak", aipatu dute. Horrekin batera, gogorarazi dute etxez etxeko laguntza-zerbitzua ez dela nahikoa, eta "baliabide publiko gehiagoz" hornitu behar da: "Nekatuta gaude, premia larri horren aurrean ezer egiten ez dugula ikustean. Hori dela eta, astelehenean udaletxera joango gara, herritarrengandik hurbilen dagoen erakundea delako eta herritarren zati hori artatzea ere bere ardura delako", azpimarratu dute.
Bizigarrik azaldu du Zaramaga hiriko auzorik zaharrenetako bat dela, eta bertakoen %34k 65 urtetik gora dituela: "Gaur egun, ordea, adinekoen zentro soziokultural bakarra du Zaramagak. Mendekotasuna duten pertsonentzako espazioen aldarrikapena Bizigarriko Auzo Elkartearen nagusietako bat da 2001. urtetik. Hala eta guztiz ere, udal gobernu batek ere ez du erreklamazio hori babestu eta, bitartean, auzoa zahartzen ari da", salatu du.