Gasteizko kultur egutegiko ekitaldi hutsezin bihurtu den Poetak Maiatzean jaialdia aurkeztu dute astelehen honetan Udalaren Antzoki Sareak, Kultura zinegotzi Estibaliz Cantok eta jaialdiko zuzendari Elisa Ruedak. "Poesia inoiz baino beharrezkoagoa da, pandemiak ezarritako murrizketak direla eta joaterik ez dugun lekuetara bidaiatzea ahalbidetzen baitigu", azpimarratu du Cantok.
Jaialdiaren ekitaldi nagusia maiatzaren 14an Paco Ibañezek Principal Antzokian eskainiko duen kontzertua izango da. Artista valentziarraren emanaldiaz gozatu nahi dutenek Udalaren Antzoki Sarearen ohiko bideetatik eskuratu ahalko dituzte sarrerak: martxoaren 25etik aurrera, abonamenduen bitartez; edo sarrera solteak erosiz, martxoaren 30etik aurrera.
"Paco Ibañez, poeten ahotsa. Humanista eta artista konprometituak emango duen kontzertua maitasun, askatasun eta duintasun proposamena da. Bidegabekeriaren, indarkeriaren eta izugarrikeriaren kontrako erresistentziaren sinboloa. Paco Ibañezen ahotsean eta musikan bilduta, XIII. mendeaz geroztik izan diren gaztelaniazko poeta handienen hitzak entzungo ditugu", azaldu du Elisa Ruedak.
2020ko edizioa online egin behar izan zen, pandemiaren ondorioz, baina aurten formatu presentzialera itzuliko da jaialdia. Oraingoz ez dute egitarauaren inguruko xehetasun gehiagorik eman, baina data hurbildu ahala ekitaldi gehiago ezagutuko ditugu.