ALEAk kontsultatutako lekukoen arabera, taberna itxita zegoen bezeroa identifikatu dutenean, eta inguruko hainbat pertsonak udaltzainen jarrera gaitzetsi dute. Iguanako tabernaria ere udaltzainekin eztabaidatzen hasi da, eta lurrean atxikituta amaitu da. Udaltzainek inguruan zeuden pertsonak kanporatu eta hainbat lagun identifikatu dituzte.
Udaltzaingoak laguntza eskatu du, eta, minutu batzuk beranduago, Ertzaintzaren patruila ugari bertaratu dira, tabernaren ingurua eta kalea husteko. Bi atxiloketa baieztatu ditu Udaltzaingoak, agintaritzaren agenteen aurkako atentatua egotzita; polizia-iturrien arabera, udaltzain bat zauritu da.
Gertatutakoa bertatik bertara ikusi duten hainbat lekukoren arabera, ordea, "ez da erasorik gertatu". ALEAri azaldu diotenez, "tabernaria terraza jasotzen ari zen eta 'Pozik naukazue' esan die udaltzainei; urduritasunaren ondorioz, mahai batean zegoen edalontzi bat lurrera erori da, eta orduan hasi da iskanbila".
Whatsapp bidez jasotako irudiak.