Castelloko Udal Bandako zuzendari Marcel Ortega Gasteizko Udal Musika Bandaren zuzendari gonbidatua izango da asteazken honetan, hilaren 10ean. Abonamenduko laugarren kontzertuak Horizonte XXII izenburua du, eta dagoeneko sarrera guztiak agortu ditu Principal Antzokian.
Lehen aldiz Udal Bandaren historia osoan, kontzertuan rap kantari batek parte hartuko du. Zehazki, Gasteizko eszenako klasiko batek, Kloy MCk, jarriko ditu rap doinuak. Bere parte hartzea Pepe Mujicaren diskurtso batean oinarrituko da.
Kontzertuaren oinarria kalitatezko errepertorioa izango da, Udal Bandak lehen aldiz joko dituen hainbat piezaz osatua: besteak beste, Joel Pucketten Asimov's aviary; Nancy Galbraithen Febris ver; Roger Boutryren Ikiru Yorokobi, eta Andrés Valero Castellsen 6. Sinfonia, Grafítica.
Jarraitu Bandari ekimenari esker, kontzertua streaming bidez ikusi ahal izango da.