Duela hamasei hilabete inguru, 2019ko urrian, Ernai gazte antolakundeak desobedientzia ekintza bat antolatu zuen Gasteizen: dozenaka gaztek trenbidea moztu zuten, Gazteok independentzia zioen pankarta batekin, Altsasuko gazteen zein Kataluniako prozesu independentistaren aurkako epaiak salatzeko.
Egun hartan, Ertzaintzak 21 gazte atxilotu zituen protestan, baina epaileak auzia artxibatu zuen berehala. Orain, urtebete eta lau hilabete beranduago, Fiskaltzak helegitea jartzea erabaki du, Ertzaintzak irudi berriak froga gisa aurkeztu ostean. Ondorioz, adin nagusiko guztiak —guztira, hamabost gazte— deklaratzera deitu ditu Gasteizko epaitegi batek, Hala Bedi hedabideak argitaratu duenez.
Hamabost gazte horiek otsailaren 18an eta 25ean deklaratu beharko dute Arabako Probintzia Auzitegian, trenbideak okupatzeagatik ikertu gisa. Bitartean, adingabeak diren beste sei atxilotuek beste prozedura bat dute irekita; kasu honetan adingabeen Fiskaltzaren eskutik.
Elkartasun kanpaina
Hala Bedik azaldu duenez, balizko epaiketari aurre egiteko sortutako Ernai Gazte Errailak dinamikak kanpaina solidario bat jarriko du martxan datozen egunetan, prozesuaren "gastu ekonomiko, juridiko eta politikoei aurre egiteko".