Urtarrilaren 2an indarrean sartu zen Trafiko Zuzendaritza Nagusiaren Errege Dekretu berria. Dekretuak "mugikortasun pertsonaleko ibilgailuen" erabilera arautzen du, eta, besteak beste, patinete elektrikoak espaloietatik zirkulatzea debekatzen du. Zehazki, sei kilometro orduko abiadura gainditzen duten patinete mota guztietako erabiltzaileei eragingo die neurriak.
Horrenbestez, hasierako jakinarazpen epea igaro ondoren, astelehenetik aurrera —otsailak 1—, espaloitik patinete elektrikoz doazenek salatuak izateko eta 200 euroko isuna jasotzeko arriskua dute. Udaltzaingoak salaketak egingo baititu haien kontra. Oraingoz, ibilgailu horiek errepidera jaitsi edo bidegorriak erabili beharko dituzte.
Gasteizko Udalak jakinarazi duenez, izaera urbanoko bide publikoetako erabilera, trafikoa, zirkulazioa eta segurtasuna arautzen dituen udal ordenantza berria landu arte aplikatuko da Trafiko Zuzendaritza Nagusiaren Errege Dekretua. Ordenantza udazkenerako aurreikusita zegoen, baina oraindik ez dago prest; zirriborroa amaitzen ari direla eta "aste batzuk" beharko dituztela esan du Gorka Urtaran alkateak.