Joan den igandean, 092 zenbakian jasotako dei batek ohartarazi zuen hiru gizonezko horiek, ustez, hegaztiak ehizatzen ari zirela Zabalgana auzoan; zehazki, Bremen kalean, eraikinik gabeko eremuan.
Udaltzainen patruila batek furgoneta batean topatu zituen hirurak. Identifikatu ondoren, udaltzainek ibilgailua ikuskatu zuten, eta Carduelis carduelis espezieko (karnaba) hiru txori zituen kaiola bat topatu zuten. Hegazti hori babestutako espezie gisa katalogatuta dago.
Ondorioz, Udaltzaingoko Ingurumeneko Taldea arduratu zen esku-hartzeaz, eta txoriak eraztuna jarri gabe zeudela egiaztatu zuen. Gainera, espezie ugaritako soinu-grabazioak erabiltzen dituen apeu elektroniko bat topatu zuten bertan; dirudienez, hegaztiak ehizatzeko erabiltzen ari ziren. Apeu soinudunaz gain, hegaztiak harrapatzeko substantzia likatsu bat —lika izenekoa— erabiltzen zuten ikertuek.
Karnabak kautelaz konfiskatu eta Martiodara eraman zituzten, Animaliak Berreskuratzeko Zentrora. Bestalde, inplikatuei epaitegian dagozkion izapidetzeak ireki zizkietela jakinarazi zieten.