Arabako Foru Aldundiak, EHUk eta Tecnaliak Garapen Farmazeutiko Aurreratuaren alorrean arituko den ikergune bat martxan jartzea erabaki dute. Lascaray eraikinean izango du egoitza ikergune berriak, EHUko Arabako Campusean.
Horren zeregina izango da gaitasun zientifiko-teknologikoak modu eraginkorrean garatzea, bultzada emateko terapia farmazeutiko aurreratuen arloan aplikatutako medikamentu 3D inprimaketa eta bio-inprimaketa teknologien ikerketari.
Ikerguneko aurkezpenean, Tecnaliako Iñaki San Sebastianek esan duenez, «egitasmo honen bidez, terapia farmazeutiko aurreratuak sortuko dira, gaixotasunak edo gaitzen sintomak sendatu edo arintzeko, eta industria sare berritzaile bat jarriko da martxan».