Gasteizko Udalak Gazte Klik Klak argazki eta bideo digitalen lehiaketa antolatzen du urtero, 14 eta 25 urte bitarteko gazteentzat. 2020ko edizioaren emaitza da Hiri orbainak erakusketa.
Lehiaketaren hamabigarren edizio honetan, 41 gaztek parte hartu zuten, eta, guztira, 54 lan aurkeztu zituzten: 44 argazki bilduma eta hamar bideo. Erakusketak irabazle eta hautatuen lanak bildu ditu. Asier Corredera, Maitane Campos, Maria Fariñas eta Liam McDonnell irabazleen lanez gain, Elaia Chacartegi, Irati Boveda, Christopher Thomas Galvez, Liam McDonnell, Susana Garcia de Vicuña, Pablo Garcia eta Sara Rodriguez zazpi finalisten proposamenen hautaketa bat ikusiko da.
Ikusgai dauden lanen artean "hiri-orbainak" kontzeptuaren askotariko interpretazioak aurkituko ditugu, hori izan baita aurtengo lehiaketarako proposatutako gaia. Besteak beste, trenbideak, kalean egiten diren obrak, herritarrak, egitasmo bat zuten lekuen eta gaur egun direnen arteko kontrastea, faltan botatzen diren lekuak zein langileak dira erakusketaren protagonistak: "Arrastoa uzten duten orbainak", azaldu dute antolatzaileek.
Ostiral honetan, Miren Fernandez de Landa Gazteria zinegotziaren presentziarekin aurkeztu dute ARTgia Sorgune & Aretoan, eta ostiraleko 18:00etan inauguratu da erakusketa.
Sara Berasaluce argazkilariak eta Alazne Payueta artistak komisariatu dute Gazte Klik Klak egitasmoaren 2020ko edizioa, ARTgia Sorgune & Aretoaren izenean; eta, halaber, 2021eko Tetrapack egitasmoaren komisario izango dira. Azken edizioetan bezala, aurreko edizioetako irabazleen artean komisario elkartua izendatu da, eta edizio honetan Yone Estivariz Urraca argazkilaria izan da.