Kaleratzeak salatzeko, Aernnovako langileek bederatzi greba egun deitu dituzte urtarrilean zehar: 7an egin zuten lehena; gaur, 12an, bigarrena; eta, ondoren, 14an, 18an, 20an, 22an, 25ean, 27an eta 29an ere greba egingo dute.
Astearte honetan izan dute bigarren greba eguna, eta Eusko Jaurlaritzatik abiatutako manifestazioa Los Angeles elizara iritsi denean eman dute itxialdiaren hasieraren berri: ez dute bertan lo egingo, baina gutxienez hilaren 18ra arte izango dira bertan, goizero, kaleratzeen aurkako protesta egiteko eta eragile politiko, sozial eta sindikalekin biltzeko. Jendartearen zein erakundeen babesa eskatu dute, kaleratzeen kontra eta euren lanpostuen defentsan.
82 langile kalera
Otsailaren 1ean, Aernnovak Berantevillan duen fabrikako 82 langile kalean geratuko dira, 450 langilek osatutako plantilla osoaren %20 inguru: 55 kaleratze, 14 aurrejubilazio —ordainsari gordinaren %65 jasoko dute— eta borondatezko 13 baja —pizgarriekin—. Lan Ikuskaritzak eta auzitegiek erabaki bitartean, zuzendaritzak jarraituko ez duten langileen zerrenda plazaratu zuen 2020ko abenduaren 31n, Gabon Zahar egunean.
Enplegua erregulatzeko espedientearen (EEE) aukera ireki zenetik iragarri zuen bezala, enpresa batzordeak ez du kaleratzerik onartuko eta protesta dinamikarekin jarraitzea erabaki du, "gehiegikeria" gisa definitu dutenari aurre egiteko. Izan ere, langileen ustez, enpresak bizi duen egoera "koiunturala da, eta ez egiturazkoa"; beraz, kaleratzeak bezalako "neurri traumatikoak" baztertzea eskatu diote zuzendaritzari.
