Pandemia gorabehera, Mari Domingi eta Olentzero arabar etxeetara joango dira aurten ere, opariak eramatera. Gainera, bidean bideo bat grabatu dute, umeei Eguberrietako zorion-agurra eta besarkada handi bat helarazteko. Bertan azaldu dutenez, abenduaren 24ko gauean ez dute huts egingo, eta hiriko txikienek opariak jasoko dituzte.
Desfilerik izango ez duten ezohiko Gabon hauetarako, Gasteizko Udaleko Kultura Zerbitzuak sustatuko dituen ekintzen artean, abenduaren 23an eta 24an, umeak Mari Domingi eta Olentzerorekin elkartu ahal izango dira Mendizorrotzeko kiroldegian, Hator, hator, Olentzero eta Mari Domingi ikuskizunari esker.
Sarrerak dagoeneko agortu diren arren, ostegunean, abenduaren 24an, ikuskizuna streaming bidez jarraitu ahal izango da Udalaren webgunean, 18:00etatik aurrera.