'Gu Kutxirekin', tabernari eta auzokideen arteko elkartasunaren bideoklipa

Ezohiko Gabonen atarian, auzokide talde batek hiriko ostalariei elkartasuna eta bezeroei maitasuna adierazteko bideoklip hunkigarri bat sortu du, Kutxiko tabernariekin elkarlanean: Gu Kutxirekin.

Iragan martxoaren 13an Kutxiko tabernariek pertsianak jaitsi zituzten, ezjakintasunez beterik. Ordutik hona egoera gero eta zailagoa bilakatuz joan da, Alde Zaharreko funtsezko kale horretan irudi mingarria utziz.

Bideokliparen sortzaileek azaldu dutenez, "galera handiko hilabeteak" izaten ari dira sektore osoarentzat: "Eusko Jaurlaritzaren aldetik gure jarduerarekiko mespretxua eta konponbide eza jasotzen dugun bitartean, gure bezero maiteen aldetik, aldiz, horrelako omenaldia. Eskerrik asko!", adierazi dute Kutxiko ostalariek, bideoklipa zabaltzeko sare sozialetan zabaldutako mezuan.

Hain zuzen ere, horretarako sortu dute abestia eta bideoa: bezeroek tabernariei omenaldi bat eskaintzeko, eta tabernariek bezeroei esker onak emateko.

EiTB Maratoiaren antzera, Bob Marleyren No woman, no cry abestian oinarrituta sortu dute abestia, Ruben Sanchez eta Amaia Lasagaren ahotsekin. Bideoklipean, Alde Zaharreko tabernari enblematiko ugari agertzen dira, ostalaritzak bizi duen une gogorrari aurpegia jarriz.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide