2018an eta 2019an eman gabeko zerbitzu batzuekin lotutako lau fakturari dagokie EH Bilduren salaketa: 2018ko azaroan, 42.042,55 euro; abenduan, 52.573,82 euro; 2019ko urtarrilean, 54.523,17 euro; eta otsailean, 24.190,86 euro. Garbiketa zerbitzuengatik hilean 1,9 milioi euro baino gehiagoko lau faktura ziren; horien barruan, eman gabeko hainbat zerbitzurengatik, guztira, 173.330,40 euro fakturatu zituen FCC enpresak.
Lau hilabete horietan, eman gabeko zerbitzuen kobrantzak detektatu zituzten udal teknikariek, eta Udalak erregularizazio espediente bat aurkeztu zuen; baina, EH Bilduk azaldu duenez, epearen barruan ez erantzuteagatik, ebazteko eta jakinarazteko gehieneko epea iraungi da. Gasteizko Udalak ez du berariazko ebazpenik eman, eta, ondorioz, ordaindu beharko ditu FCCk aurkeztutako faktura guztiak, egin gabeko zerbitzuak barne.
Gainera, bi urteko berandutze-interesak gehitu beharko zaizkio ordainketari.
Udal kontraturik handiena
EH Bilduk gogor kritikatu du jarduera horien "jarraipen zorrotza" egin ez izana: "Kontratuaren urraketa larria izan da, eta, beste behin ere, agerian geratu da Urtaranen gobernua indartsua dela ahularekin eta ahula indartsuarekin".
Garbiketa zerbitzua birmunizipalizatzeko "beste arrazoi bat" dela uste du EH Bilduko zinegotzi Amancay Villalbak, "Estatuan zaborren kartela erabiltzen duten enpresen eskutik datozen arazo horiek saihesteko kudeaketa zuzenaren alde egiteko.
Kaleak garbitzeko eta hondakinak biltzeko kontratua diru kopuru handienekoa da Gasteizko Udalean, eta hileko faktura bakoitza ia 2 milioi eurokoa da —zehazki, 1.921.752,13 eurokoa—. Hortaz, "ikuskatu" egin behar dela uste du EH Bilduk.