Eraberritzearen ondorioz, besteak beste, Aiztogile kaleko sarrerako aldaparen "inklinazio-maila handia" kritikatu dute Alde Zaharreko bizilagunek. Harmailak "testuingurutik kanpo" daudela, "inolako zorroztasun arkitektoniko edo historikorik ez" dutela, eta eremu horretan erortzeko arriskua dagoela uste dute, "orain arte kaltegabea izan den igarobide batean".
Horrez gain, Arkupeetako harriek eta eskailera berriek inguruari "itxura hotz eta despertsonalizatua" ematen diotela deritzote.
Izan ere, azken egunetan auzotarren, merkatarien eta ostalarien protestak jaso ditu Gasteiz Txiki Auzo Elkarteak: "Ez zaio auzoari galdetu, eta, beste behin ere, erreforma inposatu zaigu mugikortasun beharrei erantzun gabe eta auzo honetan bizi garenok gorde nahi dugun ingurune historikoa errespetatu gabe", deitoratu du auzo elkarteak.
Obrak berraztertu
Udalari eskatu diote berriz azter ditzala Aiztogile kalean Fariñasetik sartzeko egiten ari diren lanak, eta baita harmailen arriskuarentzako irtenbide bat ere: "Ez du inolako zentzurik igogailu bat eta eskailera mekaniko batzuk instalatzeak, gero aldapa batekin topo egiteko; ezin da gurpildun aulkiekin sartu, eta erorketa ugari eragingo ditu, bai neguan, bai edozein egun euritsutan", ohartarazi dute.
Halaber, "inguruarekin bat ez datozen" farolen instalazioa berraztertzea eskatu diote, haien ustez "inpaktu ikaragarria sortzen baitu, monumentu-multzoaren harmonia hautsiz".
Auzoaren oniritzia
Auzo elkarteak deitoratu du auzotarren, merkatarien eta ostalarien kexak ekidin zitezkeela "eraberritze-lanek auzoaren oniritzia izan balute, haien iritzia jaso izan balitz, ahalik eta adostasun handiena lortuz". Adibide gisa jarri dute Santa Maria plazako proiektua: "Herritarren parte-hartzea izan zuen, eta gaur egun auzotar guztiek onartzen dute".