Hainbat animaliaren eta intsekturen maskaraz estalitako lagunen aurpegiak irudikatutako zuri-beltzeko argazkiez osatutako obra da Estibaliz Agirre artista gasteiztarrak ARTgia aretora eraman duena. Zomorro-mozorro erakusketaren inaugurazioa urriaren 9an izango da, 20:00etan, Judimendi auzoan Irantzu Lekue artistak zuzentzen duen galerian.
2019ko edizioko EmART programan aukeratutako obra da Agirrerena, hain zuzen emakume sortzaileen ahalduntzera eta haien lana eta ekoizpena ikusaraztera bideratua dagoen ekimena.
Naturarekin lotura
Konfinamenduaren ondoren, artista gasteiztarrak "haize fresko ahokada" bat bilatu du naturan, etapa bati amaiera eman eta "udaberrian sortutako loturak agerian uzten dituena". "Naturarekiko loturak sendotzeko grinatsu eta aske sentitzen gara –esan du Agirrek–. Natura gure zaintzaile bezala ikusten dugu, aitzakiarik gabe besarkatzen gaituen ama, argitasun eta patxadaz pentsatzeko gure gune kuttuna. Bere koloreen, soinuen eta usain freskoen maitale sutsuak baikara orain".
Aurkeztu duen lanaren bidez, artistak naturarekiko lotura zalantzan jarri nahi izan du. "Geure kaiolaren barruan geratu gara, armiarma sare erraldoi batean geratu diren zomorroen antzera".