Asteleheneko 13:30ak aldera, sastrakak kentzeko lanetan ari zirela, langile batzuek sasien artean gorpu bat aurkitu zuten, deskonposizio egoera aurreratuan. Duela urtebete desagertutako gasteiztar baten dokumentazioa zuen gainean, eta, Diario Noticias de Alava egunkariak argitaratu duenez, 2019ko urrian desagertutako S.G izan liteke. 43 urteko gasteiztarrak urtebete darama desagertuta, kafea hartzera irten eta itzuli ez zenetik.
Ertzaintzako hainbat patruila eta auzitegiko medikua bertaratu ziren, eta gorpua Auzitegiko Patologia Zerbitzura eraman zuten, autopsia egiteko, heriotzaren inguruabarrak argitzeko eta heriotzaren arrazoi ofiziala zehazteko. Proba zientifiko bat ere egingo dute, zehazki, DNAren azterketa, hildakoaren nortasuna egiaztatu ahal izateko.
S.G 2019ko urriaren 4an ikusi zuten azkeneko aldiz. Orduan, bere familia hura aurkitzen saiatu zen, arrakastarik gabe; orduz geroztik, haren bilaketa sutsua hasi zuten. Urte osoan zehar, herritarren laguntza eskatu dute egunero, sare sozialen bidez.
Eusko Jaurlaritzako Segurtasun Sailak baieztatu egin du gorpu bat aurkitu dutela, baina, oraingoz, ez du baieztatu desagertutako gaztearena denik; hilotzaren deskonposizio egoerak ez baitu ahalbidetu ezaugarri fisikoak bereiztea. Halaber, Ertzaintzak baieztatu du ez dagoela kriminalitate zantzurik.