Alerta gorria: ekitaldi eta ikuskizunen sektorea kalera aterako da

Besteak beste, Jimmy Jazz aretoak bat egin du osteguneko mobilizazioekin. / JIMMY JAZZ

Ekitaldi eta ikuskizunen sektoreko profesionalak batu dira Alerta Gorria mugimendua sortzeko. Irailaren 17an mobilizazioak antolatu dituzte hainbat hiritan, tartean Gasteizen.

"Sektoreak betidanik, eta batez ere orain kultura isilarazi denean, bizi duen zaurgarritasunagatik sortu da Alerta Gorria. Gure sektorea eta gure beharrak jendartean ikustarazi nahi ditugu", adierazi dute. Izan ere, pandemiaren ondorioz, ekitaldi eta ikuskizunetan lan egiten duten ehunka familia "egoera larrian" bizi direla ohartarazi dute.

#RedAlert, #AlertaRoja edo #AlertaGorria nazioartean sortu den mugimendua da, baina Espainiako estatu mailan ere koordinatzen hasi dira jada, eta, besteak beste, egitasmoaren webgune bat jarri dute martxan.

Manifestua

Testuinguru horretan, Sektore osoa, batasun bakarra. Urgentziazko neurriak hartzeko I17 manifestua plazaratu dute. Bertan, sektorearen egoera azaltzeaz gain, hobetzeko neurriak proposatu dituzte.

Are gehiago, bi eskakizun zehatz egin dizkiete Espainiako Gobernuari eta Lan, Ogasun, Gai ekonomikoak, Kultura eta Kirola, eta Industria sailei. Lehenik eta behin, "datozen asteetan" sektore honen biziraupena bermatzeko "urgentziazko neurriak" hartzeko; bestalde, beharrak aztertuko dituen mahai sektoriala "berehala" sortzeko.

Gauzak horrela, "Estatu mailako sektoreko hitzarmen kolektiboa sortzeko negoziazio prozesua martxan jartzeari lehentasuna" ematea proposatu dute.

Sektorearen "erreskatea" gauzatzeko premiazko neurri batzuk proposatu dituzte ere; kontuan hartu dituzte langile autonomoak, besteren kontura aritzen diren langileak, enpresak eta sektorea bera, bere osotasunean.

Irailaren 17an, mobilizazioak

Lehen urratsa ostegun honetan, irailaren 17an, antolatu dituzten mobilizazioak izango dira. "Indartsuak" izatea espero dute, eta hainbat hiritan egingo dira aldi berean; tartean Bilbon eta Gasteizen. "Profesionalok segurtasunez eta profesionaltasunez" lan egiten dutela frogatu nahi dute, "lehen, orain eta beti".

Gasteizko elkarretaratzea osteguneko 20:30ean izango da, Foru Plazan. Mobilizazioek formatu berezia izango dute; hau da, ez dira zehazki manifestazioak izango, eta parte hartzeko ezinbestekoa izango da aldez aurretik izena ematea.

Mobilizazioez gain, ostegunean fatxadak, eraikinak, espazio eszenikoak, leihoak eta balkoiak gorriz argiztatu edo janzteko deia egin dute.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide