Ikasturte berrian, tokiko kultura eta nortasuna hainbat arlotan indartu eta gazteen parte-hartzerako tresnak eskaini nahi ditu Gasteizko Udalaren Gauekoak aisialdi eta kultura programak aurkeztu berri duen udazken-neguko programazioan. Programa 16 eta 30 urte bitarteko gazteei zuzenduta dago.
Doako aisialdia eta "berrikuntza, tokiko kultura eta artistak babestea eta hiriko gazteria osatzen duten kolektibo guztiak barne hartzea" oinarri duen eredu alternatibo bat ahalbidetu nahi izan dute. Horretarako, programazio berritzailea proposatu dute aurten, tailerrak, musika, kirola eta sorkuntza uztartuz.
Jarduera bakoitzean, hezitzaileak "funtsezko" elementua izango da, eta hainbat esparrutan erreferenteak diren pertsonak batu dira programara. Besteak beste, Eider Iturriaga Berri Txarrak taldeko argazkilaria, argazkigintza tailerrean; Ximon Agirre, Eskean Kristo edo Belako bezalako taldeen kartel eta bideoen sortzailea, diseinu grafikoko tailerrean; edota Juan Ibarrondo, Martxoak 3 filmaren gidoilaria, gidoi tailerrean. Gainera, Iris Audiovisual, Desikaskuntzarako Gunea (Espacio de Desaprendizaje) edo Oihaneder Euskararen Etxea bezalako elkarteekin elkarlana bilatu dute.
ALEA laguntzaile
Arabako ALEAren laguntza izango du aurten Gauekoak programak, eta, besteak beste, aurrerantzean antolatzen diren ekimen guztiak Euskararen Agendan azalduko dira eta Gauekoak atal berezia sortu da ALEAren komunitate digitalean.
Hamaika jarduera
Denboraldi honetako aliatu garrantzitsua Gasteizko Jimmy Jazz aretoa izango da. Izan ere, elkarlanean arituko dira Gazte Talent talde gazteen lehiaketaren V. edizioan. Gainera, ostiral honetan, irailaren 18an, denboraldiari hasiera emango diote bertan, Birkit eta Vulk taldeen aurkezpen kontzertuarekin.
Musikari dagokionez, M-fest! jaialdi ezagunarekin jarraituko dute, gehienbat emakumez osatutako taldeekin. "Inposaketarik gabeko espazio bat sortu, eta, horrela, oro har gizonek okupatzen dituzten espazioetan emakume musikarien parte hartzea bultzatu, normalizatu eta ikusarazteko" helburua du M-fest! jaialdiak.
Sorkuntza proposamenak ere ez dira atzean geratu, eta, Oihaneder Euskararen Etxearekin elkarlanean, Hizki Laburren Lehiaketa kontakizun laburren lehiaketa antolatu dute, gazteen aisialdian euskararen erabilera sustatzeko.
Zinema ahaztu gabe, Iris Audiovisual elkarteak bultzatutako Udazken Fest jaialdian, gazteek ekoiztutako zinemaren azken joerez gozatzeko aukera egongo da: Voragine web sailaren kapitulu pilotua estreinatuko da, eta Samantha Hudson, una historia de fe, sexo y electroqueer dokumentala emango dute.
Azkenik, kirol jarduerei dagokienez, Boulder tailer bat proposatu dute, Donnay Anaien eskutik. Rokodromoan edo harkaitzetan egin beharrean, Gasteizko Alde Zaharreko paretak baliatuko dituzte eskalatzeko.
Egitarau osoa
Izena ematea behar duten jardueretan, email bat bidali beharko da info.gauekoak@gmail.com helbidera: mezuaren gaian ekintzaren izena zehaztu eta, beharrezkoa denean, txanda adierazi. Horrez gain, mezuan izena eta abizena, adina, telefono zenbakia eta NAN zenbakia zehaztu beharko dira:
- Irailak 25: Zurrumurren aurkako escape room-a (3 txanda).
- Irailak 26: Zurrumurren aurkako escape room-a (3 txanda).
- Irailak 26: Desprintzesatzeko tailerra.
- Irailak 26: Zurrumurren aurkako chatbot-a (2 txanda).
- Urriak 17 eta 24: Diseinu grafiko tailerra.
- Urriak 17: Boulder topaketa.
- Urriak 24: Serigrafia tailerra.
- Azaroak 6: Autoerretratu eta ilustrazio tailerra.
- Azaroak 14 eta 21: Argazkilaritza tailerra.
- Azaroak 20 eta 27: Gidoigintza tailerra.
- Abenduak 12: Gozogintza tailerra.
Bestalde, jarduera ireki ugari daude, eta horietako gehienetan ez da beharrezkoa aurretik izena ematea:
Musika
- Irailak 18: Aurkezpen jaialdia | Birkit eta Vulk.
- Azaroak 14: M-Fest.
- Datak zehazteke: Gazte Talent.
- Abenduak 19: Amaiera jaialdia.
Sorkuntza
- Urriak 22: Bertoko zuzendarien Film Laburren Jaialdia.
- Urriak 30: Tetrapack, bertoko artisten erakustaldiaren inaugurazioa.
- Azaroak 20: Hizki laburren lehiaketa.
- Azaroak 21: Udazken Fest, Film Laburren Jaialdia.
Kirola
- Abenduak 12: Roller derby.
Aisia
- Urriak 17: Rol jokoa.