Gasteiz Txiki auzo elkarteak Udalari eskatu dio azter ditzala berriz Aiztogile kalean Fariñasetik sartzeko egiten ari diren obrak, "eta bilatu dezala irtenbide bat eremu horretan bertan dauden harmailek sortzen duten arriskua ekiditeko". Haserre agertu dira auzokideak San Frantzisko aldapan egiten ari diren obrak direla eta. "Ez du inolako zentzurik igogailu bat eta eskailera mekaniko batzuk instalatzeak, gero aldapa batekin topo egiteko", esan dute. Gainera, aldapa horrek inklinazio-maila handia duela diote, eta "ez du gurpil-aulkiekin ere sartzen uzten"; halaber, ziur daude "erorketa ugari" eragingo dituela, batik bat neguan, eta "edozein egun euritsutan".
Kexu dira, halaber, Udalak obrak erabakitzeko orduan ez dituelako auzokideen iritziak kontuan hartu. "Auzokideen, merkatarien eta ostalarien kexak eta protestak jaso ditugu, eta guztiak bat datoz: beste behin ere, alde zaharreko eremu enblematiko bat eraberritu behar dute gure mugikortasun-beharrei erantzun gabe eta auzo honetan bizi garenok babestu nahi dugun ingurune historikoa errespetatu gabe".