Gauekoak: Birkit + Vulk

Gauekoaken udazken-neguko egitaraua aurkezpen jaialdian inguruko bi taldek osatuko dute kartela: Birkit eta Vulk.

Birkit: Birkite Alonso gasteiztarrak Bilbon egin du musika ibilbidea, 2002an Eorann (rock/post-rock) taldea sortu zuenetik 2010ean Red Carmine (indie/shoegaze) bere bigarren taldea banatu zen arte. Bost urteko etena egin ondoren “Emen” izeneko lehen bakarkako lana autoeditatu zuen 2017ko abenduan, gitarra elektriko hutsean, Iñaki Alonsok Gasteizko Sonora estudioan grabatuta.

Azken aldian Euskal Herriko kontzertu aretoak bisitatu dituen edonork badaki zer den Vulk. Andoni de La Cruzek, Alberto Eguiluzek, Julen Alberdik eta Jangitz Larrañagak osatzen duten laukoteak oso noizean behin bakarrik agertzen den karisma erakusten du. Beraien kasuan: oholtza gainean, non bat-bateko energia guztia askatu dezaketen. 2018an, Vulkek bere bigarren LPa argitaratu zuen, Ground for Dogs (2018) (Elsa Records, MEYO Records), Montreal Studiosen eta Estudios Brazilen grabatua. Bertan, hasierako indar kontrolatuaren jarraitutasuna hauteman daiteke, orain zati erritmiko eta melodiko progresiboagoekin nahastuta, eta Institute, King Crimson, Television, This Heat, The Fall, edo Uranium Cluben eragina entzun daiteke. Vulken hirugarren luzea ateratzear dago.

Sarrera gonbidapen bidez izango da.