Moriako krisi humanitario larriaren testuinguruan, Ongi Etorri Errefuxiatuak elkarteak elkarretaratzeak deitu ditu larunbat honetan Hego Euskal Herriko hiriburuetan, errefuxiatuen birkokapena exijitzeko. Gasteizko elkarretaratzea Andre Maria Zuriaren plazan egin da, eguerdiko hamabietan.
Lesbos (Grezia) irlako Moria errefuxiatuen kanpalekuko 13.000 pertsonak Europako herrialdeetan "berehala" birkokatzea eta hauei "harrera duina" ematea aldarrikatu du Ongi Etorriak Errefuxiatuak plataformak.
"Etorkizuneko belaunaldiak lotsatuko dituen tragedia humanitario baten aurrean gaude, nazien kontzentrazio esparruek II. Mundu Gerraren ondorengo belaunaldiak sumindu zituzten modu berean", ohartarazi du OEE Arabak.