Gaueko hamabi eta erdiak aldera, Ertzaintzaren patruila batek bi gizon ikusi ditu Gasteiz Hiribidean dagoen joko-areto batean maskara jantzi gabe.
Gizonetako bat, polizia ikusi duenean, oihalezko poltsa bat ezkutatzen saiatu dela azaldu du Ertzaintzak, ohar bidez. Poltsa barruan marroi koloreko substantzia prentsatu bat aurkitu diote plastikoan bilduta eta 100 bat gramoko hiru paketetan banatuta; ustez, haxixa zen. Gainera, kokaina zirudien hauts zuri bat ere aurkitu diote beste poltsatxo batean.
Horren aurrean, gizonezkoa droga-trafikoa leporatuta atxilotu dute. Beste gizona, 27 urtekoa, ertzain-etxera eraman dute identifikatzeko; Valentziako epaitegi batek bere kontrako atxilotzeko agindua emanda zuela jakin ostean, atxilotu egin dute.