Arabako Foru Aldundiak, Gasteizko Udalarekin lankidetzan, bisoi europarraren beste kumaldi bat askatu du Salburuan aste honetan. Ama bat eta hiru kume dira, eta espezie horren hazkuntza programaren barruan, itxian hazi dituzte.
Bisoi europarra egoera kritikoan sailkatuta dagoen espeziea da, haren lehiakide handia den bisoi amerikarraren mehatxua dela eta. 1998. urteaz geroztik, Aldundia eta Udala lankidetzan ari dira kontrol lanak egiten, "espezie exotiko inbaditzaile hori naturan ugaltzen ari zela detektatu zenetik". Hala, azken urteetan, animalia harrapatzeko jarritako tranpei esker, Araban dagoeneko ez dago bisoi amerikarraren alerik.
"Ez dugu bisoi amerikarrik aurkitu 2019. urtearen hasieraz geroztik, eta horrek erakusten du kontserbazio lana funtzionatzen ari dela", adierazi du Josean Galera Ingurumen eta Hirigintza Saileko foru diputatuak, eta pozik agertu da egindako urratsengatik eta bisoi europarrak egoera "egonkorra" duelako herrialdean.