Gasteizko Alde Zaharrean taberna bat itxi du Udaltzaingoak bart, zerbitzari batek positibo eman ondoren. Modu horretan, Udalak balizko koronabirus agerraldi bat baztertu nahi duela adierazi du. Aiztogile kaleko tabernan sartu ziren poliziak larunbatean, 23:15 aldera, eta zortzi pertsona identifikatu zituzten, tartean bertako bezeroak eta langileak.
Udaleko iturriek azaldu dutenez, zerbitzarietako batek positibo eman du Covid-19a atzemateko proban. Horregatik, jende gehiago kutsatzeko aukera baztertu nahi dute.
Positibo gehiago Araban
Eusko Jaurlaritzako Osasun Sailak gaur bertan jakitera eman duenez, Araban 62 positibo berri atzeman zituzten larunbatean, horietako 58 Gasteizen. Iragan ostegunean, 27 kutsatu berri jakinarazi zituen Sailak hiriburuan eta beste bi Laudion; beraz, positiboek nabarmen egin dute gora hirian azken egunetan.