Cabaret Festival jaialdia bertan behera geratu da, balizko berragerraldiak direla eta

Cabaret Festival jaialdia abuztuaren 1etik 12ra ospatzekoa zen Iradier Arenan. / BASOTXERRI

Jaialdia abuztuaren 1etik 12ra Iradier Arenan ospatzekoa zen, Zea Mays, Izaro, Pirritx, Porrotx eta Marimotots, Gatibu, David Bisbal, Hombres G, Los Morancos edo Duo Dinamico bezalako artisten emanaldiekin.

Espainiako pop musikaren zein Euskal Herriko musikaren izen ezagunenetako batzuen emanaldiak biltzekoa zen Cabaret Festival jaialdia ez da abuztuaren 1etik 12ra bitartean ospatuko. Erositako sarreren dirua automatikoki itzultzen hasi dira dagoeneko.

Jaialdia gehienez 1.000 ikusle hartzeko pentsatuta zegoen, baina "antolaketa zailtasunak" direla eta, bertan behera uztea erabaki dute sustatzaileek. Izan ere, berragerraldiak areagotuko diren edota jaialdiak antolatzeko murrizketak ezarriko diren beldur dira. Gainera, aitortu dute azken egunetan eta agerraldien gorakadaren aurrean "artista batzuen eta ikusleen kezka" nabaritu dutela. 

"Une honetan aire zabaleko ekitaldien edukiera aldatu ez bada ere, inork ezin du bermatu pandemiaren bilakaeraren arabera datozen egunetan egin behar ez denik", adierazi du Nervion Flyn ekoiztetxeak; hala ere, ez du baztertu ospakizuna beste data batzuetan egitea, egoeraren arabera.

Cabaret marka duten beste hainbat hiritako emanaldiak mantendu dituzte; adibidez, Las Palmas Kanaria Handikoan edo Andaluziako hiri batzuetan.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide