CCOO sindikatuak azaldu duenez, istripuaren arrazoiak ez dira oraindik argitu, baina hildakoa Izobex Construcciones SL enpresa madrildarreko langilea zen. Istripuaren momentuan Adania enpresarako azpikontratatuta zegoen, Aretxabaletako promozio batean lanean.
Osalan eta Lan Ikuskaritza istripua ikertzen ari dira. Istripuen kausak zehazten dituzten ikerketa horien emaitzen zain, CCOOko Eraikuntza eta Zerbitzuen Federazioak enpresei eta administrazioari eskatu die behar diren neurriak har ditzatela horrelako gertaerak berriro gerta ez daitezen.
"Laneko istripuei buruzko datuak ikaragarriak eta onartezinak dira aurten, baina are gehiago ekoizpen-jardueraren geldialdia kontuan hartuta", salatu du CCOOk, ohar bidez.
CCOO sindikatuak elkarretaratzea egingo du asteartean Gasteizen, lan istripu hilgarria gaitzesteko, hildakoaren senideei eta lankideei babesa helarazteko, eta horiek saihesteko "berehalako neurriak" har daitezela eskatzeko. Mobilizazioa 12:00etan izango da, Posta kaleko 9. zenbakian dagoen SEAren egoitzaren aurrean.
42 lan heriotz
ELA sindikatuaren arabera, azken heriotz horrekin dagoeneko 42 dira 2020an Euskal Herrian lanean bizitza galdu duten pertsonak, "koronabirusak lan eremuan eragin dituen heriotza zenbaezinak kontuan hartu gabe"; 42 horietatik bik Zalbibarko zabortegian lurperatuta eta desagerturik jarraitzen dute.
Hildakoaren senitarteko eta lagunei elkartasun eta babes "zintzoena" adierazi die ELAk ere, eta "prekarietate egoera" salatu du: "Prekarietate hau lan erritmo jasanezin, jardunaldi amaigabe eta sektoreko hitzarmen nahiz prebentzio araudiaren urraketan bihurtu ohi da, are gehiago eraikuntzaren sektorean".
Horrez gain, konfinamendu egoeran Eusko Jaurlaritzak lan baldintzak "are gehiago" ikuskatu beharko lituzkeela deritzo sindikatuak; izan ere, langileak "erabateko indefentsio egoeran" aurkitzen direla uste du.
ELA, LAB, ESK, STEILAS, HIRU eta EHNE sindikatuek beste mobilizazio bat deitu dute asteazkenerako, 11:30ean SEAren aurrean.