Gasteizko Udalak ez du "txupinazo sekreturik" jaurtiko abuztuaren 4an

Jende pilaketak saihestu nahi ditu Gasteizko Udalak. / fiestasvitoria.com

Txupinazoa "leku sekretu" batetik botatzeko ideia baztertu egin du Udalak, baina omenaldia egingo zaie osasun langileei. "Ez dugu nahi beste herri batzuetan izan diren jende pilaketarik gertatzea", azaldu du Estibaliz Cantok.

Udalak ez du txupinazorik jaurtiko abuztuaren 4an, osasun langileei eskainiko dien omenaldian. Euskal Herrian izandako azken gertakariek eraman dute Udala erabaki hori hartzera, Covid-19ak berriro ere hedatzea ekar lezakeen jende pilaketarik gerta ez dadin.

"Azken egunotan hainbat ospakizun ikusi ditugu han eta hemen, Gasteizen eta beste leku batzuetan, eta nola sortu diren jende pilaketak, eta ez diren errespetatu gaixotasunaren hedapena galarazteko beharrezkoak diren neurri sanitarioak", deitoratu du Kultura zinegotzi Estibaliz Cantok.

Zinegotziak salatu du ekintza horietan parte hartu zuten pertsona askok ez zutela maskararik erabili, eta ez zutela segurtasun-distantzia mantendu. Guzti hori ikusita, hirian txupinazorik ez egitea erabaki dute: "Gasteiztarren osasuna zaintzeko egokiena hori dela uste izan dugu, eta horrekin arduraturik hartu dugu erabakia", jakinarazi du Cantok.

Osasun langileei omenaldia

Bestalde, iragarri bezala, osasun langileei omenaldia mantentzea erabaki du Udalak, "pandemia honekin gehien sufritzen ari den kolektiboetako bat" delako. "Gure ustez eskertu beharrekoa da izan duten inplikazioa, herritarrei eskaini dieten laguntza, beren gain hartu duten arriskua", gaineratu du zinegotziak.

Udala lanean ari da dagoeneko, jendaurrean izango ez den ekitaldi instituzionala antolatzeko. Era berean, abuztuaren 4an, omenaldia egingo zaio Zeledoni, Urrezko Zeledon Saria emateko ekitaldian, Principal antzokian.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide